Tu Lioah Thinlung Re A Theibikmi Cu Ralkap An Si

Pu Zasang Cinzah nih a ṭialmi hia  dik tuk. Tulio ah a thinlung re a theibikmi cu, SAC ralhrang, Ralkap hna hi an si. A thi viar ding in an iruah. Cunglei nawl peknak zulh lo ah thih. Zam ah thih. Ral doh ithawh zong ah thih. Lairam ah MAH nih a rak thlahmi hna zong hi hmailei kal in ral an tukter hna i, an zam sual ah thah, kah colh ding in an hnu lei ah security an chiah piak hna ti a si.

SAC Ralkap hna hi tam deuh cu, Slum, lamkam ah a vakmi, slumdog pawl an tlaihmi hna an si i, an hrut. An molh. Thil an thei lo. Map zong an hngal lo. An ral a chia fawn. Laitlang ah an duhzat rak kai hna seh, an thil tawm he tlangpar pakhat an kai ah an tha a dih cang lai. Cucaah, Chin pasal hna, Chinland, Chin ram a vengtu hna nih fawi tuk in an tei hna lai tiah ka ruah ko.

Asinain, Chin pasal hna, Lao Tzu bia hi rak inunpi ko u! “There is no greater danger than underestimating your opponent.” An zuam cawhtu fawi tuk in ruah nakin ttih a nung deuhmi a um lo” Lai Tzu. Ralkap hi zeitluk an der zong ah, Khua ram, flingtlang an hngalh lo zong ah “underestimate” tuah ding an si lo. Ralrin tein, timh ciah tein, fim khur te in doh ahcun, Mino thisen tampi a him lai. Kan tei fawn lai.

MAH/ SAC ralhrang nih kan Chin miphun ral a kan thawh hnawh cang caah, Mino, upa, nu le ngakchi tiang telh in kan ral doh a herh lio caan kan phan. Ram chung, Ramleng, kan dihlak in tanrualnak nih teinak a kan pek lai. Parties Politics le biaknak, doctrine tbk ah kan ikhahnak lonak kan thil kha tthumh cio hna usihlaw, kutsih in kan ral, SAC terrorist hi techin fapar chan tiang a nguhmi teinak hmuh dingin ithawh cio hna usih.( Zasang Cinzah)