Ramchung Sianginn 500 mei in An Khangh, Saya 37 an Thah Rih Hna
Tlawnginn (500) Leng Lo Ah Bomb An Puah Ih An Ur Ti’n SAC Theihternak Vuanzi Sangtu In A Sim- Myanmar ram pumpi, nikum cazir kum ah bomb puah le mei ur mi, tlawnginn (504) an um zo ih zirhtu mi (37) an thi tiah SAC theihternak vuanzi sangtu Bochuk Zaw Min Tun in mizan sun May 19, Naypyitaw ih an tuah mi a vei (14)nak thuthang simfiangnak ah a sim.
“Nikum cazir kum ahcun tharum hmangtu pawl ih siatsuahnak ruangah bomb puah mi, tlawnginn (504) a um, zirhtu mi (37) an thi. A tu khal tlawng on hlan ihsin hringhronak an tuah mi hmuh a si”tiah a sim. Cazirnak tlawng pawl bomb an kam, ဘန်ကာ sak in hmun an khuar tikhal in a sim bet.
Atak hmunram thuthang ahcun SAC ralhrang pawl in tlawnginn pawl, biakinn, phungki tlawng pawl khal hrelh lo in khawpi le khawte pawl cu mei in an ur mi hmuh a si vekin tualleng nauhak pawl khal an siat suah. Khawpi sung tlawnginn pawl khalah SAC ralhrang pawl in ဘန်ကာ an sakih hmun an khuar hai. NUG ih a tawlrel mi fimthiam zirnak program thawn pehpar in SAC ih theihternak vuanzi sangtu in a dokalhnak ṭong pawl thuthang simfiangnak an tuah.
“Fimthiamnak thawn pehpar in mipi zate ralring dingin ka sim duh mi le lo hmuh duh mi pakhat ka nei. Hi lam ah tlawng kai lo dingin an sim. Khat lam ah annih in ca kan zirh ti’n an ti. Himi ah ziang mi a thupaw timi kan zoh asile nan hmu thei ko ding” tiah Bochuk Zaw Min Tun in a sim ih Vedio file a hmuh hai.
SAC in vedio file a pho suah mi ahcun Free Online Education Institution Myanmar le Islamic Organization Myanmar pawl hmuh in an sim. Hih buur pawl cun online ihsin a lakin an zirh thei ih subject tinkim an zir thei tiah a sim.
Asina’n Bochuk Zaw Min Tun cun Islamic Organization Myanmar (IOM) lawng cu a hleice ah retin a sim.
IOM facebook ahcun annih hi Myanmar le ramkip cazir ding mi class tinkim cu online ihsin an zirh vekin computer, English ṭong pawl khal an zirh tiah an tarlang. Asina’n Bochuk Zaw Min Tun cun Islam biaknak class ih zir ding mi biaknak lam ca pawl lawng a tarlang ih NUG cozah in hivek in an zirh ti’n a sim.
Cuihlei ah PDF pawl cun cazir ding hnaihnoknak a pek vekin tlawnginn pawl ah bu an khuar ti khalin a sim bet.
Myanmar ram pumpi tlawnginn pawl ah ralkap sal fimthiamnak dokhalh dinhmun in zirhtu pawl, fimthiamnak lam hnaṭuan pawl in CDM canghvaihnak ah an tel vekin tlawngta pawl khalin tlawngkai lo in an dokalh tiah DVB in a tarlang a si. TCT