Pasaltha Hna aw… Kanin Siang Hrim Hna Lo eee

SAC Ralkap Fighter Nih Senthang Ram Chung Bomb Thlaknak Ah CDF Senthang Ralkap Pakhat Nunnak Liam Than. May 8 zanlei suimilam 5:00 tluk ah SAC Fighter nih Khuapi khua ah bomb a thlak ruangah CDF Senthang AGS Salai Siang Cung Hnin nih a nunnak a pek i, pathum hliamhma an pu. Hliamhma pumi chungah CDF Senthang Companny Commander Salai Duh Len Hmung zong a hliamhma a fah tuk caah nihin May 9 zinglei suimilam 2:30 ah a thaw a dih ve, tiah theih a si. Ralhrang jet nih bomb thlak ruangah nunnak a liammi CDF Senthang AGS salai Siang Cung Hnin nunnak a liam i, khuami minung 3 hliam an tuar rih.

Thla Hnih Chungah SAC Ralkap Jet Fighter Nih Chinram Chungah Voi 100 Leng Bomb A Thlak!Chin ramkulh chungah SAC ralkap Jet Fighter nih thla hnih chungah voi 121 leng bomb a thlak, tiah CNF zungpi nih cathanh an chuah.Thantlang peng ah voi 39, Hakha peng ah voi 39, Falam peng ah voi 17, Mindat peng ah voi 19 le Tedim peng ah voi 4 bomb a thlak ruangah inn tam ngai an rawk i tualchung mi 20 leng hliamhma an pu, tiah an langhter. March thla in April thla tiang SAC ralkap nih khuate 4 ah bomb lung 22 an thlak i a dang lung 99 cu khuate kiangkap ah an tla. Thla hnih chungah CNA ralkap 2 nih ram le miphun ca ah an nunnak an pek i, tualchung mi 24 an nunnak a liam. Minung 33 hliamhma an pu. Thla hnih chung SAC ralkap bomb thlak ruangah Biakinn he aa pehtlaimi inn 4 an rawk i tualchung mi inn 50 leng an rawk, tiah CNF nih May 8 ah cathanh an chuah.

Thailand In Malaysia Kal Aa Thawhmi Leilawng I Pahsualnak Ah Chinmi 3 An Nunnak A Liam. Thailand ram thlanglei Sukala ramkulh, Hatyai pengkomh ah May thla zarhkhatnak ah Thailand in Malaysia lei kal aa thawhmi leilawng cu a dang leilawng he an i pahsual caah Chinmi 3 an nunnak a liam, tiah Chin Community Bangok nih May 8 ah an langhter. Thailand ram in Malaysia lei kal aa thawhmi leilawng chungah minung 15 an i cit i, Mara mi 1, Paletwa mi 1 le Ngapaing mi 1 cu an nunnak a liam. Minung 5 hliamhma an pu i, a dang cu an him dih. Hliamhma pumi cu sii-inn ah an kalpi hna nain a dang cu thong ah an khumh hna caah chanhchuah dingin kan i zuam cuahmah, tiah Chin Community Bangok nih cun an langhter. A luncia 2022 August 17 lio zong ah Thailand in Malaysia lei kal aa thawhmi leilawng pakhat zong thingkung a rak i pahsual caah Kalaymyo in Chinmi 2 an nunnak a rak liam cang, tiah theih a si.

Nunu – Na lung a dong in na nun a ba tuk ve maw? A caan ah cun kan minung hawi nih theihthiam piak khawh le bawmh khawh lo dingin hma kan tuar caan a um tawn. Minung hmur kaa in a chuakmi biafang dawh dawh le thazaang peknak bia ṭha ṭha hmanh kan nunnak ah sullam ngei loin kan tuar i kan ai hram caan a um tawn. Bawmtu tak van hai in kan ai hram. Kan taksa in a fakmi cu siibawi sin tel ah kan kal i sii hmang in damnak kan hmu. Asinian thinlung lei in tuarnak le lungdonghnak pawl caah sii din awk a rak um ve lo. Damnak ding kan kawl kan ti i kanmah min chiatnak lam a chuak. Kan hma kha kanmah tein kan i tuam tikah dam loin a pormi bang khin, kan i hrawk chinchin. Bawmchantu kan ngei hnga maw tiah minung hawi sinah kan chim kan phuan kan rel. Chikkhat kan thinlung damnak caah a ṭha tuk. Pathian nih anmah hmang in kan thilrit a kan chawn caan a um tawn. Nain mi cheu khat cu kanmah thangchiatnak le namnehnak kan tonnak lila tu ah aa chuah. (Dawtu tak sinin cun thazaang kan hmu ko). Bawmtu tak le thilrit chawngtu tak van hai in kan thinlung a ba. Nun kan zuam nak a dong. Zei bantuk phaisa le, chawva le bia dawh le hla dawh nih kan nun a car mi a hninghno ter kho ti lo. A dongnak ah nunnak hi kan caah batnak men ah aa chuah. Kanmah le kanmah kan i hua.

Sihmanhsehlaw, Pathian kha kan zeizong a si tiin kan fuh kan panh a si ahcun, thinlung chungah daihnak a vun i sem, mitthli a tlak cuahmah lio ah hna ngamnak nih hmunhma an vun lak. Kan nun ahhin Pathian thilti khawhnak langh a duh caah a si ti kha fiang tein kan hun hngalh ṭhan. Pathian bia le Pathian aw dah lo nih cun zungzal in daihnak a kan pe kho lo. Khrihfa mi hna, kan nih cu Bawipa loin kan si kho lo. Bawipa loin kar kan hlang kho lo ti kan i hngalh bak in, daihnak cu kan sinah a phan ṭhan. Hawi dawt, dam na duh maw? Na ba tuk maw? Na tuar a fak maw? Na pum a dam nain na thinlung a zaw tuk maw? Pathian cu naih ṭhan ko. Pathian cu fuh ṭhan ko. ”Nang cu na sual tuk, nang cu na hnawm tuk. Nang cu na tling lo” tiin an kir ter bal lai lo. Cucu keimah minu nih kan ton dih cangmi a si. Johan 14: 27 “ Daihnak kan chiah tak hna, keimah daihnak cu kan pek hna. Vawlei nih an pek hna bantukin kan pe hna lo. Lungrethei van sang in um hlah uh. Nan thin zong phang hlah u“. Pathian nin a kan pekmi daihnak cu vawlei pekmi daihnak he aa lo lo.