Ngeih A Chia Ko,Manipur Palek Nih Myanmar Ralzam 45 An Thawl Hna

India ram, Manipur ramkulh, Kamjong District chung Phaikok khua ah aa dormi Myanmar ralzam 45 hna cu Sept 16, chunhnu suimilam 1 hrawngah khan Manipur palek nih Myanmar ram lei ah an thawl hna tiah theih a si. Ralzam 45 chungah 34 cu nu an si.

India ram Manipur ramkulh hi Myanmar in Sagaing ramthen le Chin ramkulh hna he 398 km ramri aa tlaimi a si.Manipur ahhin Myanmar ralzam zeimawzat an lut i Chin miphun zong an i tel len ve. Cheukhat cu tha tein cohlan le zohkhenh an si nain cheukhat cu Myanmar lei ah thawlmi zong an um lengmang tiah theih a si.

A dang: Kawlram in Mizoram Lut Dingmi Caah Sagnau, Lawngtlai District Lei In Thawngthanh. Sangau khua chungah Ralzaam i dornak ding minung 600 leng caah hmunhma a um. Young Lai Association, Sub-HQ hruainak in Ralzaam camp mi 1000 hrawng aa tlumnak ding umnak zong Sept ni 20 hrawng thawk in sak timh cuahmah lio a si.

Cu pin ah Lairam chung Sangau khua le a pawngkam khua hna ah ralzaam caah inn le lo hmunhma minung 800 tlum a um tiah lai ruahdam a si. Chin State in Lairam, Sangau khua le pawngkam ah a zaam duh mi kan um a si ah cun YLA hna sinah chawnhbiak le pehtlaih lengmang khawh a si. Pehtlaihnak rak tuah chung lo zong in luh cuahmah khawh a si. YLA, Pangkhua nih Saisihchuak ah an rak in tawlrel hna lai.

Ref; The Chin Post