New Mon State Party(NMSP) An Chuak Cang

Remdaihnak Phu Hruaitu In New Mon State Party(NMSP) An Chuak!. Rampi kahdaih hnatlaknak minthutu tlangcung hriamtlai phufonh Peace Process Steering Team(PPST) hruaitu dirhmun sinak in New Mon State Party(NMSP) cu an chuak, tiah theih a si. New Mon State Party(NMSP) cu PPST hruaitu sinak in an chuak nain PPST phufonh hna he pehtlai in rian kan ṭuan ko lai, tiah PPST in chimphuannak nawlngeitu Colonel Saw Kyaw Nyunt(KNLA-PC) nih a chim. “PPST Committee hruaitu dirhmun in kum khat leng ṭuanvo a latu NMSP Vice Chairman Naing Aung Min cu pumpak ngandam lonak ruangah le NMSP central committee biachahnak in PPST hruaitu sinak in an i din. Cuhlan caantling chungtel bantuk si ti loin ṭangṭi phu bantuk lawng in an um cang lai,” tiah a chim.

PPST phu cu Nationwide Ceasefire Agreement (NCA) minsen thutu phu 10 nih an dirhmi a si i, SAC nih nawlngeihnak an laak hnu in Karen National Union(KNU), Chin National Front(CNF) le Restoration Council of Shan State(RCSS) cu an chuak. NMSP cu PPST hruaitu sinak in an chuah caah Arakan Liberation Army(ALP), Democratic Karen Buddhist Army(DKBA), Karen National Liberation Army (KNLA-PC), Lahu Democratic Union(LDU), Pa-O National Liberation Army(PNLO) le All Burma Students’ Democratic Front(ABSDF) lawng an taang cang, tinak a si. PPST hruaitu meeting cu a ra laimi May 17 le 18 khin Thailand ram Chiangmai ah kan tuah lai i, NMSP nih chuahnak ca an ṭialmi hi kan ceih lai maw ceih lai lo ti cu a fiang rih lo, tiah PPST in chimphuannak nawlngeitu Colonel Saw Kyaw Nyunt nih a chim.

Matupi khua Ah MPT Le MEC Phone Line Hman khawh Ṭhan A Si Cang. Chin ramkulh, Matupi ah 2023, May 12 zaanlei suimilam 5:00 hrawng in MPT le MEC phone line hman khawh ṭhan a si cang tiah The Matupi Times nih a ṭial. Caan saupi Matupi peng ah phone line hman khawh a si lo hnu in, Matupi khuachung hmun cheukhat ah nizan May 12, zaanlei suimilam 5:00 in phone line hmanh khawh a si cang nain Matupi khuachung hmunkip ah cun a ngah rih lo, tiah theih a si. Matupi pengchung ah thlichia ruangah a chuak khomi harnak ral in i ralrin ding le a himnak hmunhma ah i ṭhialkam kho ding in thawngthanhnak zong an tuah, tiah theih a si.
SAC nih hramhram in an rak tlaihmi Chin tlangval 4 an thlah than hna.

Chin ramkulh Paletwa khuapi ah SAC nih hramhram in an rak tlaih mi mino pali hna cu May 12 ah Sittdwe thonginn in an chuahter cang hna tiah thawng kan theih. Sittdwe um Chinmi pakhat nih, “Nizaan May 12 zinglei sang ahkhan a thlah than hna. Paletwa lei tu hi cu an phak le phak lo ka thei rih lo,” tiah The Chin Post ah a chim. Mah hna pali hi 2021 March 28 ni i Paletwa khuapi chung bomb a puah hnu ah khan an tlaih mi hna a si i thla nga chung bia an ceih hna hnu ah an thlah than hna. Cun, a thlah than hna hnu ah an pali ning in a tlaih than hna tiah theih a si. Atu an thlah than mi hna hi Khumi hlasak thiam pakhat , Company riantuan pakhat le thingram lei zung ah rian a tuan mi hna an si. An tlaih than hna hnu ah bia an caih than hna i an pali ning in kum hnih cio thong an thlak hna hnuah atu bantukin a voihnihnak an thlah than hna hi a si!