Mipi Nun Him Hi A Biapi, Ral A Thawh Cang Ko Caah
Mizapi Nunhimnak- Civilian Protection; Ral a thawh cang caah kahdohnak a um tik ah aa kapmi hriamtlai an thih cu a phung a siko bantuk in a herh ahcun nunnak pekding in bia a kam mi an si cang. Sihmanhsehlaw hriam a tlai ve lomi khuami rammi sawhsawh kahdohnak chung in an nunnak a himding cu a biapi tukmi asi. Hriamtlai zong nih asi khawhchung in an i zuammi asi tswn.Mizapi civil zawnruahnak le humhimnak ruatduh loin mizapi harnak a pemi, a thatmi, inn a duahmi,
Nu a tlaihhremmi, Inn bauh in thil lakpiak a hmangmi hriamtlai cu ralhrang ‘terrorist’ ti an si. Atulio kan ramchung kahdohnak caan tawite chung hmanh ah mizapi civil tamtuk kan thi cang i a thih zong kan thi rih teko lai. Cu chung in zeitindah a thimi kan tlawm khawh lai tiin khuami mizapi nih kanmah himnak ding cu kan si khawhchung in i runven ve kan herh. Ruahnak cheuhmi cheukhat:
1. Inn chung lawng ah i erh loin Khua le vengsang inn pawngkam thil umtuning mi choklet ralkap choklet kha zoh ngiat pengding.2. Thawngpang thanhtu media pawl nih thawng thar an thanhmi rel pengding.3. Na khua/ na vengsang ah thil umtuning phundangdeuh in a um i kahdohnak a um khoding asi ti na zumh ahcun na chungkhar lawng siloin na thanh khawhmi pohpoh i ralrin ding in thawng na thanh cio hna lai.
4. Nan khuachung/ vengsang ah kahdohnak a um ahcun kahdoh thawng a daih hlan lo nan chungkhar tein a himnak bik inn tang/ khor cawhmi ah nan i thup zokzok lai.5. Nan inn ah i thuhnak a that lo le khor cawhmi nan ngeih lo ahcun na innpa vengsang a himdeuh lai tiah nan ruahmi inn ah zaam ding. 6. Na phone silent-vibrate aw ringlo ah chia. Na hawile na chungkhat dang he nan in chawnh ahcun dimte in chawn hna.
7. Kahdohnak thawng a daih hnu suimilam a cheu hnu lawng ah khua upa/sang upa/hawi sin ah thawngpang hal hna.( Khua upa/Mino upa pa 2,3 phone number tal i hngalh cia hrimhrim ding).8. Mizapi civil chung in a thimi le hma a pumi an um ahcun sang upa le pastor chimh colhding.9. Kahdohnak le bomb puaknak hmun kha fuhpanh in naih hrimhrim hlah. Bomb a puaknak le kahdohnak a dih hnu zong ah a pawngkam ah bomb le hriamnaam taangmi um khawh asi caah ralring tein zohfel hmasa ding.
10. Bomb le hriamnam na hmuh ah siseh, a kapmi kap hnih chung in a thimi ruak na hmuh zong ah nangmah nih tawngtham loin Khua/sang upa/pastor/ambulance sin ah thawng thanhding.11. Nan pawngkam ah tlaihkhihnak/ inn ah luhhnawhnak thawngpang na theih ahcun vengsang upa/na pastor phone in na chimh hna lai.
12. Nan umnak hmun a him lotuk tiin nan ruah ahcun a nai bik ralzaam umnak (IDP) camp ah umding. Atu tiang ahcun ralzaam umnak hmun IDP camp hi khuapi chung ah kan ngeih rih hna lo caah khuate ah an zaam ngai. Cucaah khuapi chung ahkomiti nih IDP camp timhlamh zokzok ding.Kanmah runvennak le kan hawile humhimnak cu mizapi (civil) dihlak nih tuanvo kan ngeih ve bantuk in lung tthawng ngai in ttangti hna usi.Bawipa nih kan kilveng koseh. Daniel