Facebook Nih RalHrang He Aa Pehtlai Mi Group Vial Te A Phih Dih Lai

Ralhrang ngeihmi business hna le ralhrang he aa pehtlaimi facebook page, group le account vialte hna cu kan phih dih lai tiah Dec 8, tuni ah Meta (Facebook) nih a thanh. Hihi ralhrang hna cungah dantat phihkharnak caah kan tuahmi a si tiah cathanh ah facebook company nih an langhter.

Nawlngeihnak lak hnu tlawmpal ah khan Facebook nih ralhrang he aa pehtlaimi company hna fakthanhnak cu a rak phih piak cang hna. Cun ralhrang bawi cheukhat hmanmi account zong a rak phih piak cang hna. Atu i ralhrang he aa pehtlaimi page, group le account an phih piakmi hna hi ralhrang nih nuhrin covo a buarnak a ngan chin lengmang caah a si tiah theih a si.

Cun zatlangbu le nuhrin covo bu hna nih ṭha tein an hlathlai hnuah an hmuhchiahmi kha US, EU le ram dangdang ah an chimrelmi zong cherchan ah kan lak tiah Facebook nih cun an thanh fawn. Cu pin ah Myanmar ramchung boruak cu ṭha tein kan ngiatthlai peng lai i mizapi himnak le ṭhatnak caah a si herhning in kan cawlcang lai tiah Facebook nih an cathanh ah an langhter. The Chin Post