NLD Hruaitu Pakhat Yangon Ah An Kah Thah Than

NLD Hruaitu Pakhat Yangon Ah An Kah Thah Than.Yangon khuapi, Lanmadaw, Ward-9 ah NLD party chairman a simi nu pakhat Daw Khin Nay Myo cu meithal in kah a tong i sizung an kalpi lio ah lampi ah a nunnak a liam tiah theih a si.

Daw Khin Nay Myo thah a ton hi nizan zingka ah khan a si. Lanmadaw Ward-9 ah a ummi Zaw Gyi Market pawngah zinglei suimilam 5am hrawngah khan Daw Khin Nay Myo cu a hawi le minung 2 he thil cawk ah an kal.

Dawr hmai an dir lio ahcun motor chungin mi pakhat a rak chuak i cu pa nihcun a zal in meithal aa chuah i voithum a kah. A hawi nu nih a chimnak ahcun meithal in kah a ton lio ahhin ka bawm ulaw tiah a au ko nain a hohmanh an chuak lo.

Kan umnak pawng ahcun police sakhan zong a um ko nain a hohmanh an rak chuak lo. Charity Group nih an ngeihmi ambulance tuin sizung ah an kal pi hi a si tiah a chim. A tulio hi kawl ralkap nih NLD member pawl cu an thah cuahmah hna i tampi an thah cang hna.

A hlei in ralkap nih dirhmi Phyu Saw Htee phu nihhin biatak tein thah nawnnak hi an tuah ve. Cun dang khat in Ralkap a dotu phu NLD a tanhmi phu hna zong nih dalan tiin mi tampi cu an thah ve fawn hna caah nifatin tiawk in thahnawnnak hi a chuak. Ref: Myanmar Now