Sataung ah Pyu Saw Htee caah zeen a phor mi khuabawi le

Sataung ah Pyu Saw Htee caah zeen a phor mi khuabawi le a kuttang pa cu ralhraang nih an kah palh hna.
Sagaing ramthen, Sataung peng, Nyaungngoketo (ညောင်ငုတ်တို) khua pawng, November 10 zaanlei sang ah Pyu Saw Htee pawl Bomb sernak i hman ding zeen a phortu khuabawi le a kuttang pa cu ralhraang nih PDF ah an ruah palh hna caah an kah hna tiah tualchung mi sin in kan theih.

“Nyaungngoketo khuabawi le a kuttang pa pakhat an si. Khua Pyu Saw Htee pawl bomb sernak ca ah zeen an phorh mi a si lai. Sataung khua chuah Nyaungngoketo khua phanh hlan ah ralhraang nih check ding in an dirter i khuabawi ka si ti in a dir duh lo caah an kah,” tiah tualchung mi pakhat nih a chim.

Kah a tong mi hi Nyaungngoketo khuabawi Ko Naing Htay kum 40 hrawng le a kuttang Ko Aung Ko kum 20 hrawng an si i hliam hma faak ngai in Mandalay sii-inn ah an i thlop lio tiah chim. Ralhraang nih an kah mi hna pahnih hi Nyaungngoketo khua pawng PDF sakhan pakhat zong ralhraang sin ah report tu an si tiah kan theih. The Hakha Time