Taliban Ralhrang Nih Kabul Khualipi An Laak Taktak Khawh Cang
Taliban tapung nih Afghan khualipi an erhkhumh; President Ghani a zam cang an ti (updated)—Pu Zing Cung nih “Raldoh cu thinlung in doh asi” a timi kha hihi a si. Taliban tapung nih Afghan ram cu an chim(ting) dih ngawt cang i atu hi Kabul khualipi an luhhnawh cang— vabu hlawm in hlawm an timh. An ram president cu a zam cang tiah news tamdeuh nih an tial.
Pesident Biden nih naite July thla ahkhan “Afghan ralkap cu sing 3 an si i tha tein kan train hna i hriamtha kan pek hna. Taliban cu 75,000 fai lawng an si” tiah a ti. Asinain a ruahning bantuk a rak si naisai lo. Tapung nih vangkau in an thlaak hna. Zeiruang bik ah hme tapung nakin a let thum renglo in ralkap thazang a ngei i US nih pekmi vanlawng le meithal thatha a nei komi cozahpi nih cutirumro cun an der hnga? A mak ko.
A biapi bik cu thinlung a rak si tihi a lang. Afghan cozah ralkap tamdeuh cu hlawhfa (ကြေးစား) lungput an nei. Kan ram kilvengtu kan si timi lungput an nei lo. US nih lahkhah pek ruangah kan tuan tiah an iruat. Cucaah eihmuarnak (corruption) zong khuaruahhar in ralkap chungah a karh i zohchia khin an um ti si. Cucaah tapung he tlawmpal an hun ikah men ah an lungdong i an zam, asiloah, an i-ap (surrender) colh.
Taliban ralkap cu ‘kan ram kan lak than hrimhrim lai’ timi hacangrialnak lungput an ngei (Cheukhat cu hramhram in fialchom le hmuhtheih duh zong cu an um ko lai). CNF Chairman Pu Zing Cung nih “Zeibantuk hriam tha hmanh hi thinlung thawnnak he hmanti lo ahcun an hnawl dih” a timi kha Afghan ral dohnak le Vietnam raldohnak ah a fiang khun.
Salai: Ceu Bik Thawng